Абай университетінің шетелдік студенттері Алматы қаласы тарихы музейіне барды

2025 жылдың 14 қаңтарында «Хәкім Абай» Ұлттық тәрбие орталығы мен Оразалы Досбосынов атындағы Жас ақындар мектебінің ұйымдастыруымен «Алматы музейлеріне саяхат» тәлімгерлік жобасы аясында Филология факультетінің шетелдік студенттері Алматы қаласы тарихы музейіне барды.

Абай атындағы Қазақ ұлттық педагогикалық университеті мен Алматы қаласы Мәдениет басқармасының арасындағы Ынтымақтастық меморандум аясында жүзеге асырылып отырған шараның мақсаты - шетелдік студенттерге әсем қаламыз Алматының тарихын таныстыру, білім алушылардың мәдени әлеуетін күшейту, тұлғалық-азаматтық қасиеттерге тәрбиелеу мен рухани құндылықтарды және тарихи мұраны кеңінен насихаттау болып табылады.

Жетісу өңірінің тарихи-мәдени мұраларының барлық саласын қамтыған ірі ғылыми және мәдени орталыққа барған шетелдік студенттер бейнелеу өнерінің шығармалары, қазақ этнографиясының бірегей жинағы, сондай-ақ қазір Алматыда тұратын әртүрлі халық өкілдерінің этнографиясы, әр дәуірдің мәдениеті мен тұрмыстық заттарының коллекциялары, нумизматика, фотосуреттері, құжаттары бар музейдің 40 мыңға жуық экспонаттарын тамашалады.

Сонымен қатар, білім алушылар «Ежелгі және ортағасырлық Алматы тарихы», «Қазақ мемлекеттігінің бастауында», «Жетісу этнографиясы», «Алматы тарихының Верный кезеңі», «Алматы ХХ ғасырда», «Кәсіби өнердің» дамуы, «Желтоқсан», «Алматы - Тәуелсіздіктің алтын бесігі» деп аталатын музей залдарын аралап, Алматы қаласының мың жылдық тарихымен, шаһардың қола дәуірінен қазіргі кезге дейінгі өмірімен танысуға бірегей мүмкіндік алды.

Айта кетейік, «Алматы қаласы музейлер бірлестігіне» қарасты Алматы қаласы тарихы музейі, Ықылас атындағы Халық музыкалық аспаптар музейі, Д.А.Қонаев музейі, Н.Тілендиев мемориалдық музейі, С.Мұқанов және Ғ.Мүсірепов атындағы әдеби мемориалдық музей кешені, Мультимедиялық дәстүрлі музыка орталығы, Ахмет Байтұрсынұлы музей-үйіне кіру және экскурсия университет басшылығының тарапынан тегін, ақысыз түрде жүзеге асырылуда.

«Хәкім Абай» Ұлттық тәрбие орталығы