Ректор Болат Тілеп Математика, физика және информатика факультетінің студенттерімен кездесті

2024 жылдың 7 қарашасында Абай атындағы Қазақ ұлттық педагогикалық университетінің ректоры Болат Тілеп Математика, физика және информатика факультетінің 1-4 курс студенттерімен ашық диалог форматында кездесу өткізді.

Кездесу барысында ректор Болат Тілеп студенттердің университет өміріне, әсіресе академиялық, ғылыми, халықаралық және қоғамдық іс-шараларға белсенді қатысуының маңыздылығына тоқталды. Сонымен қатар ол жастардың көшбасшылық және ұйымдастырушылық қасиеттерін дамытудың негізгі элементі ретінде студенттік өзін-өзі басқару ұйымдарының қызметін жетілдіру қажеттігін атап өтті.

Университеттің материалдық-техникалық базасын жақсарту, жаңа заманауи кітапхана салу, білім беру бағдарламаларын жаңарту және инновациялық бағыттарды кеңейту бойынша өзекті мәселелер талқыланды. Педагог мамандығын оқыту перспективаларына, академиялық ұтқырлық мүмкіндіктеріне, сондай-ақ шәкіртақы және университеттің имиджіне қатысты мәселелерге ерекше назар аударылды.

Кездесудің маңызды сәттерінің бірі университеттің беделін арттыру, білім беру бағдарламаларын жетілдіру, студенттердің интеллектуалдық әлеуетін дамыту және оқу орнының имидждік саясатын нығайту стратегиясын талқылау болды. Ректор оқу орнының жетістігі әрбір студенттің жетістігіне тікелей байланысты екенін айта келе, түлектердің еңбек нарығындағы бәсекеге қабілеттілігін арттыруда оқу орнының беделі шешуші рөл атқаратынын атап өтті.

Іс-шара студенттерге университет басшылығына маңызды сұрақтарын қойып, оларды еркін түрде талқылауға мүмкіндік берді. Бейресми кездесу барысында қатысушылар өз сауалдарын айтып қана қоймай, өзекті мәселелер бойынша ұсыныстарымен де бөлісті.