«Ораз Жандосовтың қоғамдық – саяси қызметі» тарихи-танымдық кездесу кеші

«Хәкім Абай» Ұлттық тәрбие орталығы мен Оразалы Досбосынов атындағы жас ақындар мектебінің ұйымдастыруымен көрнекті мемлекет қайраткері Ораз Қиқымұлы Жандосовтың туғанына 125 жыл толуына орай «Ораз Жандосовтың қоғамдық - саяси қызметі» атты тарихи-танымдық кездесу кеші өтті.

Шараның спикері - Қазақстан Республикасы Президенті архиві, ХХ ғасырдағы саяси қуғын-сүргін материалдарын зерделеу орталығының басшысы, саяси ғылымдарының докторы, профессор Гүлшат Нұрымбетова болды.

Қазақ халқының біртуар ұлы, республикада əкімшілік мемлекеттік басқару жүйесін ұйымдастыруға жəне Қазақстанның халық ағарту саласының қалыптасуына баға жетпес үлес қосқан Ораз Қиқымұлы Жандосовтың тағылымы мол тұлғасын дəріптеу мақсатында ұйымдастырылған шараға әлеуметтік және жастар саясаты жөніндегі департамент директоры Рақымберді Жетібай қатысты.

Кездесу барысында Гүлшат Нұрымбетова Ораз Жандосовтың қызмет еткен жылдарына байланысты архивтік материалдар негізінде тың ақпараттармен бөлісіп, оның өмірі мен республиканың мемлекеттік басқару жүйесін құрудағы, білімді, гендерлік саясатты қалыптастыру мен дамытудағы, жер-су реформасындағы рөлі және оның саяси-қоғамдық, халықаралық қызметтегі ерекше үлесі туралы айтып өтті.

Шара қатысушылары Ораз Жандосовтың өмірі мен қызметі туралы тың деректер алғанына қуанышты екендерін білдіріп, пікірлерімен бөлісті және ұлттық құндылықтарды болашақ ұрпақ үшін сақтаудың маңыздылығын талқылады.

«Хәкім Абай» Ұлттық тәрбие орталығы