«Тәуелсіздік пен ұлттық құндылықтар» рухани-танымдық кездесу кеші

2024 жылдың 4 желтоқсанында Тәуелсіздік күніне орай, «Хәкім Абай» Ұлттық тәрбие орталығының ұйымдастыруымен «Тәуелсіздік пен ұлттық құндылықтар» тақырыбында рухани-танымдық кездесу кеші өтті.

Кездесудің құрметті қонағы - Абай атындағы Қазақ ұлттық педагогикалық университетінің Ардагерлер кеңесінің төрағасы, Қазақстан Жоғары мектебінің Ұлттық ғылым академиясы «Қазақстан Жоғары мектебінің еңбек сіңірген қайраткері», ҚПҒА Құрметті академигі, «Құрмет» орденінің иегері, педагогика ғылымдарының докторы, профессор Берікжан Әлмұхамбетов болды.

Ұлттық сана-сезімді ояту, жастар арасында патриотизмді нығайту, тәуелсіздіктің тарихи мәнін ашу және ұлттық құндылықтарды дәріптеу мақсатында ұйымдастырылған шараға университеттің әлеуметтік даму жөніндегі проректоры Мақсат Жақау, әлеуметтік және жастар саясаты жөніндегі департамент директоры Рақымберді Жетібай, Педагогика және психология факультетінің ұстаздары мен 100-ге жуық университеттің белсенді студенттері қатысты.

Кездесу барысында профессор Берікжан Әлмұхамбетов өз тәжірибесі мен білім беру саласындағы жетістіктері турасында сыр шертіп, заманауи еңбек нарығында сұранысқа ие құзыреттіліктер туралы айтып, студенттерге ғылым мен білім саласында жаңа белестерді бағындыруға арналған ақыл-кеңестерімен бөлісті. Жастардың рухани тәрбиесі мен адамгершілік қағидаларын қалыптастыру және ұлттық құндылықтарды сақтау мен дәріптеудің қажеттілігін атап өтті.

Кеш соңында қатысушылар сұрақтар қойып, өз пікірлерімен бөлісіп, білім беру жүйесіндегі өзекті мәселелерді талқылауға мүмкіндік алды.

«Хәкім Абай» Ұлттық тәрбие орталығы