Ректор Өнер факультетінің студенттерімен кездесті

2024 жылдың 8 қарашасында Абай атындағы ҚазҰПУ ректоры Болат Тілеп Өнер факультетінің студенттерімен ашық диалог форматында кездесу өткізді. Кездесуге университеттің әлеуметтік даму жөніндегі проректоры Мақсат Жақау, Өнер факультетінің деканы Кәрім Байғұтов қатысты.

Кездесу барысында студенттер өздерін қызықтыратын сұрақтар қоюға, сондай-ақ өз пікірлері мен ұсыныстарын айтуға мүмкіндік алды. Ақылы негізде білім алушыларға жеңілдіктер беру, түлектерді жұмысқа орналастыру және бітіруші курс студенттерінің дипломдық жұмыстарын жазу үшін материалдық-техникалық жағдайлар жасау сияқты мәселелер талқыланды. Сонымен қатар, университеттің инфрақұрылымын жақсарту, асханаларда қолжетімді бағаларды ұйымдастыру, студенттік клубтардың жұмысын жаңарту және сабақ кестесін қайта қарау мәселелері көтерілді.

Кездесу соңында ректор Болат Тілеп оқу орнының жоғары ғылыми әлеуетін дамытуға баса назар аударылатынын, заман талабына сай білікті педагогтарды даярлап шығару үшін барлық жағдай жасалатынын айтты.