Алматыда мектепке дейінгі балабақша ұйымдарына арналған республикалық конференция өтті

2024 жылдың 6 қарашасында Алматыда «Мектепке дейінгі тәрбие мен оқыту ұйымдарындағы жобалау қызметі» республикалық ғылыми-әдістемелік конференциясы өтті.

Конференцияда мектепке дейінгі тәрбие мен оқыту ұйымдарында жобалау іс-әрекеті мен оның тиімді жолдары талқыланды. Шараны Алматы қаласының Білім басқармасы ұйымдастырды.

Конференцияның басты мақсаты - мектепке дейінгі білім беру ұйымдарының сапасын арттыру, педагогтердің деңгейін көтеру, сонымен бірге балабақшалардағы білім кеңістігін ұйымдастыру тетіктерін жетілдіру, оған қоса республиканың түкпір-түкпірінен келген мектепке дейінгі білім беру мамандарының өзара тәжірибе алмасу алаңын ұйымдастыру.

Іс-шараға ҚР Білім Министірлігі Мектепке дейінгі  білім департаменті басқармасының басшысы Бағымкул Куптлеуова, Мектепке дейінгі білім беру мазмұны зертханасының басшысы Гульнара Мукушова, «BilimInvest» басшысы Күләнда Батырбекова, мектепке дейінгі білім беру және әлеуметтік педагогика кафедрасының қауымдастырылған профессоры Гулбану Тастановна және де республика аймақтарындағы мектепке дейінгі ұйым өкілдері мен басшылары, тәрбиешілер, магистранттар мен докторанттар қатысты.

Ғылыми-әдістемелік конференцияда мектепке дейінгі білім беру және әлеуметтік педагогика кафедрасының PhD, аға оқытушысы Сауле Еркебаева сөз сөйледі. Өз сөзінде аға оқытушы ерекше білім беруді қажет ететін балалар үшін білім беру кеңістігін ұйымдастыру тәсілі ретіндегі жобалау қызметі туралы кеңінен баяндап, осы саланы барынша егжей-тегжейлі зерттеудің және осы бағытта өңірдегі мамандармен бірлесе жұмыс істеудің маңызына тоқталды.