ҚР Тұңғыш Президенті күніне арналған студенттер көрмесінің ашылуы

2020 жылдың 1 желтоқсанында университет ректорының қолдауымен дәстүрлі «Үздік пленэр» жобасы аясында ҚР Тұңғыш Президенті күніне арналған студенттік көркемөнер туындыларының есеп беру көрмесі ашылды. Көрме Студенттік ректорат және «Смартстудент» жастар бастамалар орталығының ұйымдастыруымен өткізілді.

«Жастар жылы» аясында бастау алған студенттік өзін-өзі басқару ұйымы Студенттік ректораттың бастамасымен Алматы облысында Өнер, мәдениет және спорт институтының студенттеріне дәстүрлі сурет салудан практикалық «Үздік пленэр» табиғи-бейнелеу жарысы биылғы жылы пандемиялық жағдайға байланысты тоқтап қалған еді.

Дегенмен, аталған пленэрдің маңыздылығы - көркем өнердің кәсіптік жолындағы дәріс алушылардың шығармашылық өнеріне машықтануын қолдау, кәсіби шыңдалуға жағдай жасау, студенттердің ынтасын арттыру өз маңыздылығын жойған жоқ. Себебі, пленэрде аталған институттың 2-5 курс студенттері мен магистранттардың анықталған үздік жұмыстары багетпен безендіріліп, университет қорына табысталды. Ал ең үздік бес жұмыс университет ректорының арнайы сыйлығына ие болды.

Жобаның осылайша сәтті қорытындысына қатысқан университет ректоры көрмедегі көркемсурет туындыларының авторлары білімгерлердің практикалық сапалы жұмыстары алдағы уақытта, айтулы коммерциялық көрмелерге, әлеуметтік жобалар мен құрметті қонақтарға, университет жатақханалары мен корпустарына таратылатындығын жеткізді. Сонымен қатар, алдағы дәстүрлі оқыту жүйесіне келген білімгерлердің арасында 2021 жылғы үздік пленэрлерді Жамбыл Жабаевтың 175 жылдығы мен еліміздің тәуелсіздігіне отыз жылдықтарды атап өтуге, абыз ақынның туған өлкесіне, шығармашылығын көркемдеп сомдауға арналатын жаңа жоспарларымен бөлісті.

Ректор студенттік жобаның ойдағыдай өтуіне атсалысқан университетіміздің Студенттік ректоратына, «Смартстудент» жастар бастамаларын қолдау орталығына, Өнер, мәдениет және спорт институтының оқытушы-ұстаздар қауымы мен студенттеріне үлкен алғысын білдіріп, Тұңғыш Президент күнімен барша білімгерлер мен ұстаздар қауымын құттықтап тілектестігін жеткізді.

Студенттік ректорат