«Жас кәсіпкер Abai University 2024» стартап-жобалар конкурсы Demo Day

2024 жылдың 11 желтоқсанында Абай атындағы Қазақ ұлттық педагогикалық университетінде «Жас кәсіпкер Abai University 2024» стартап-жобалар байқауының финалы өтті. Ғылым департаменті ұйымдастырған ауқымды іс-шара жас инноваторлар, кәсіпкерлер және сарапшыларды бір арнаға тоғыстырып, батыл идеяларды жүзеге асыру алаңына айналды.

Аталған іс-шараны Зерттеу қызметі және инновация жөніндегі проректор Ертай Сұлтан ашып, қатысушыларға сәттілік тіледі.

Байқаудың мақсаты - жас зерттеушілердің кәсіпкерлік дағдыларын дамытуға қолдау көрсету, білім алушылар мен жас оқытушылардың бизнес-идеяларын іске асыруға ынталандыру және жаңа буын креативті көшбасшыларын қалыптастыру.

Финалға жеткен қатысушылар өтінім тапсырудан бастап, техникалық сараптама, офлайн және онлайн форматтағы оқыту бағдарламаларына қатысу, сондай-ақ сарапшылардан жеке кеңес алу сияқты күрделі әрі мазмұнды кезеңдерден өтті. Байқауға қойылған талаптардан сүрінбей өткен 16 команданың ішінен тек 6 команда финалға жолдама алды.

Финалдық кезеңде байқауға қатысушылар шығармашылық пен кәсіпкерліктің жаңашыл қырларын көрсете білді. Demo Day барысында командалар ұсынған стартаптарды университет басшылығы, кәсіпкерлер және тәуелсіз сарапшылардан тұратын әділқазылар үздік жобалар анықтап, сертификаттар табыстады.

«Жас кәсіпкер Abai University 2024» байқауы, университеттердің инновация мен кәсіпкерліктің орталығы ретіндегі рөлін айқындай отырып, байқауға қатысушы жас мамандардың бизнес-идеяларын жүзеге асыруға мүмкіндік берді.