«Тұрақты даму» Жер Қоры коммерциялық емес жастар қоғамдық бірлестігі өкілдерімен кездесу

2024 жылдың 31 қазанында Абай атындағы ҚазҰПУ-да «Тұрақты даму» Жер қоры коммерциялық емес жастар қоғамдық бірлестігі өкілдері - ҮЕҰ директоры Алан Бейсен мен қор еріктілері арнайы іссапармен келді. Стратегия және интернационалдандыру жөніндегі проректор Айгүл Искакова және әлеуметтік және жастар саясаты жөніндегі проректор Мақсат Жақау қатысқан бұл кездесуде тараптар тұрақты даму, жастар саясаты және бірлескен жобалар саласындағы ынтымақтастық мәселелерін талқылады. Алан Бейсен қордың басымдықтары туралы, оның ішінде қоршаған ортаға, табиғатқа қамқорлық жасау іс - шараларын іске асыру туралы жоспарларымен бөлісіп, алдағы жобалары туралы баяндады. Қазіргі уақытта аталған қор декарбонизация жобасына қатысуда. Жоба Павлодар облысында ағаш отырғызуды көздейді. Сонымен қатар қор белсенділері «Атамекен» ҰКП қолдауымен Павлодар облысында жастар орталығын ашудың алдағы жобасы туралы айтты. Жоба мақсаты - жастардың экологиялық санасын қалыптастыру және патриотизмге тәрбиелеу болып табылады.

Кездесу аясында Әлеуметтік және жастар саясаты департаменті қонақтарды университет тыныс-тіршілігімен таныстыру мақсатында экскурсия өткізді. Онда департамент қызметкерлері студенттік ұйымдардың қызметі туралы айтып, білім алушыларыдың шығармашылық жұмыстарын көрсетті. Кездесу барысында қор белсендісі Нұрдәулет Сағымбек өзінің авторлық кітаптарын сыйға тартты. Кездесу тұрақты даму және жастар саясаты мақсатында Абай университетінің аталған қормен өзара ынтымақтастығының бастауы болады.